Albert MARQUET, (Bordele, 1875- Paris, 1947)
Bergeret kaia, Baionan, 1924ean,
Olio taula

Bordelen sortua 1875ean, Marquet Pariseko Arts Décoratifs eskolan sartzen da 1890ean. Han ezagutzen du Henri Matisse. 1895ean Arte Ederretako eskolan onartua da. Corman eta Gustave Moreau irakasle ditu. 1905ean Marquet margolariak parte hartzen du Larrazkeneko Erakusketa famatuan, Vlaminck, Derain, Friesz eta Matisse lagun dituela. "Fauvisme" margolari oldearen sortzea izan zen. Albert Marquet-i portu paisaiak laket zaizkio. Bidaiaz doa Europako eta Ipar-Afrikako herri askotara, eta handik itzultzen portu-biziari lotuak diren margolan anitzekin. 1924ean Alger, Sète, Bordele eta Baionan egoten da.

Baionako hiriak "Fonds Régional d'Acquisition des Musées diru-laguntzarekin erositako margolan honek erakusten du Aturri ibaiaren bazter eskuina Baionan, behere-aldetik goiti-alde ikusia. Gibelean burdin-bide zubia ageri da, kea darion tren batek zeharkatzen duela. Gibel-gibelean, Pirenetako lehen muinoak, eta Larruna, zurpailago. Iduriz Loustau hoteleko laugarren solairutik margotua, ikusmira Santezpiko zubiaren gainetik Bergeret kaiara doa.

IZARRA lantegia ikusten da bere keziloarekin eta murruan margotutako LIQUEUR publizitatearekin. "Distillerie de la Côte Basque" zelakoak bere edari "Izarra" 1904ean abiatu zuen komertzialki. Joseph Grattau, markaren sortzaileak, 1913ean erosi zituen lurra eta eraikinak, eta han kokatu arno-erretegi, soto, lantegi eta bulego, Bergeret kaia, 9 helbidean. Eraikinak askatasunez margotuak dira, orduko karta postalek erakusten ez dituzten bezala. Orai, leku hortan berean goi-mailako bizitegiak altxatu dira. Margolan horretan lehen aldikotz ikus daiteke auzotegi hori estetika garaikidean aurkezturik. Egilearen eskua garbiki ageri da, maite dituen ñabardura ubelurdinak arinki bastan uzten dituela, Japoniar gisara. Artistak, beste zenbait margolanetan bezala, erdigunetik bazterralde, sendo finkatzen ditu gainazal handi margotuak, doi-doia moldaturik, itzal ubelurdin argitsutan, zilueta arin eta nagi iduri batzurekin. Aturri gaineko ontzixka, bere gibel-arraulariarekin, han-hemenkako ibiltzaileekin, orga uzkaliak aitzinaldeko upelen ondoan, mintzagura diren ikur horiek guziak atsegin izanen zitzaizkion Roland Barthes bati, hain zituen miresten Baiona eta asiatar neurritasuna. Beste "Fauves"ek ez bezala, Marquet-ek eguratsaren itxura konduan hartzen du, hori baita haren artearen berezitasuna, ederki ageri dena haren portu margotuetan.